ቪኦኤ የዓለም አቀፍ ሚዲያ ወይስ የአሸባሪዎች ቱልቱላ? ከከዲር አዎል

አንድ የሚዲያ ተቋምሆነ ጋዜጠኛ ለተቋቋመበት አላማ የሚሰራ የሚተጋ ቢሆንም የጋዜጠኝነትን ስነ ምግባር ሆነ መርሆዎች በማክበር ሚዛናዊ የሆነ መረጃዎችን ወይም ዘገባዎችን ለተደራሹ የማቅረብ የሙያ ግዴታዎች እንዳሉበት ይታመናል፡፡ ይህ የሚሆነው የሚዲያውን የመረጃ አሰባሰብም ሆነ የመረጃ ምንጮች በጥንቃቄ ተመርጦ የመረጃውን ጭብጥ ወይም ትክክለኝነት ለማረጋገጥ ዘጋቢው ወይም ጋዜጠኛው ጉዳዩን በተመለከተ የግለሰብ አመለካከቱ ተፅዕኖ የማይታይበት ሆኖ ሲገኝ ብቻ ነው፡፡
ከላይ ለመንደርደርና ትዝብቴን ለመግለፅ ያህል ካስቀመጥኩ የአሜሪካ ድምፅ ሬድዮ የአማርኛው ክፍል ሰሞነኛ በኦሮሚያ ክልል የተፈጠረዉን ግርግር ያቀረባቸው ዘገባዎች የአንድ የአደገና የሰለጠነ ሀገር ሚዲያ እንዲሁም በሙያው የተካኑና ልምድ ያካብቱ ጋዜጠኞች የሚያቀርቡት ዘገባ ሳይሆን በእኔ ግምት ኢሳት በኢትዮጵያ ስርጭት መቋረጥን ተከትሎ ኢሳትን ተክቶ እየሰራ እንደሆነ በእጅጉ አስመስሎታል፡፡  ኢሳት የለየለት ሚዛናዊ ዘገባ የማይጠበቅበት የአሸባሪው ግንቦት 7 ልሳን ነው፡፡ በዚህ ረገድ ሊተች ይገባዋል ብዬ አላምንም፡፡ የተቋቋመበት አላማው ነውና፡፡
ቪኦኤ ግን በኦሮሚያ በተፈጠረው "የማስተር ፕላን" ይነሳልን ጥያቄ ተነስቶ የነበረውን ጥያቄ ተከትሎ በመንግስት በኩል የተወሰደውን ህጋዊና የማረጋጋት እርምጃ አስከተወሰደ ድረስ እንዲሁም ይህን ፅሁፍ እስከ ተፃፈበት ጊዜ በኦሮሚያ በተለያዩ ቦታዎች የሚነሱ ለሶሻል ሚዲያ ግብአት የሚሆኑ ረብሻዎችን ሳይቀር በየቀኑ በሚያቀርቡት ዘገባዎች የአማርኛው ክፍል ከኦሮምኛው ክፍል እየተዋሰ በማቅረብ በኢትዮጵያ ያለውን መጠነኛ ተደማጭነትን በመጠቀም የአሸባሪዎች ቱልቱላነቱን ቀጥሏል፡፡ ለነገሩ ሚዲያው  ሣይሆን አሸባሪ በሚዲያው ተቀጥረው የተሰበሰቡት ጋዜጠኞች የኢትዮጵያን ዕድገትና አለም አቀፍ ተፅዕኖ ፈጣሪነት የእነሱ ግብአተ መሬት አድርገው ስለሚያዩት እንደሆነ ሣይታለም የተፈታ ነው፡፡
የቪኦኤዎቹ ጋዜጠኞች እ.ኤ.አ. በFeb, 17/2016 ያቀረቡትን ሪፖርት ብቻ ለአብነት በመውሰድ "የሽብርተኛ ድርጅት" ደጋፊዎች መሆናቸውን መረዳት ይቻላል፡፡ በዕለቱ ሰለሞን አባተ ያቀረበውን በሻሸመኔና በአካባቢው የነበረውን ግርግር  ለመዘገብ በትዝታ በላቸው በኩል "ከእማኞች" ብለው ያቀረቡት የአካባቢው ነዋሪ ነኝ ባይ ግለሰብ የ75 አመቱ አዛዉነት አቶ በዳሳን የስልክ ቃለ ምልልስ ማዳመጥ የጋዜጠኞቹን ድብቅ አጀንዳ መረዳት ይቻላል። ይህ አዛዉንት አቅም አግኝተዉ በከተማዉ ተዘዋዉረዉ የተመለከቱ ይመስል በከተማው ያሉት ተማሪዎች በሙሉ ሰለማዊ ሰልፍ  እንደወጡ ቀጥሎም የአድቬንቲስት ኮሌጅም መቀላቀላቸዉን፣ ‘የኦነግን ባንዲራን’ ለመስቀል ሊሞክሩ ሲሉ በፌዴራል ፖሊሶች ተደብድበዋል ወዘተ… እያለ ሲናገር የተደመጠ ሲሆን ትዝታ በጠየቀችው ጥያቄ ግን የግለሰቡ ማንነት በግልፅ ማወቅ ይቻላል፡፡ የቀረበላቸዉ ጥያቄ ‘ይህን ኢንተርቪው ሲሰጡ በኋላ ችግር ሊደርስብኝ ይችላል ብለው አይፈሩም’ ነበር አዛዉንቱ ግን የመለሱት ይህ የ100 ዓመት ችግር ነው፣ እኔ ምንም አልፈራም ህይወቴን ሙሉ ስታሰር ነው የኖርኩት፣ ምን ያደርጉኛል ፣ ቀደም ሲል ኦሮሞ በመሆናችን ብቻ እየሞትን ነበር አሁንም እየተደረገ ያለዉ ይህዉ ነው  ነበር፡፡
ለመሆኑ የቪኦኤ ጋዜጠኞች ይህን አዛዉንት ሰው እንዴት መረጡት? እንዴትስ አገኙት? ማንስ አገናኛቸው? እነዚህን ጥያቄዎች ለመመለስ ሲፈለግ ብቻ ጋዜጠኞቹ ማሰተላለፍ የፈለጉትን መልዕክት ትኩረት የስጡ እንጂ የመረጃዉን ታማኝነትም ሆነ ሚዛናዊነት አላስጨነቃቸዉም፡፡  ቪኦኤዎች ለነገሩ ከአራት የማያንሱ በአሀር ውስጥ በየቦታው ተንቀሳቅሰው የሚዘግቡ ጋዜጠኞች (correspondents) እንዳሉአቸዉ የታወቃል፡፡ እነሱን ስለ ድርቁ እንዲዘግቡ ወደ ገጠር እንጂ ወደ ኦሮሚያ አይልኩም ምክንያቱም አሸባሪዎች የሚሰጡአቸዉን ስምና  ስልክ ደውለው የወደቀውን ተሰበረ የተሰበረዉን ሞተ እንዲሉ የተመከሩትን የቪኦኤ ጋዜጠኞች ደግሞ "እማኞች" የሚሏቸውን የአንድ ወገን አስተሳሰብ በተከበረው የአለም አቀፍ ማዲያ በኩል ሕዝብን ለማሸበር እየተጠቀሙበት ነው፡፡ በእውነት እንነጋገር ከተባለ እነ እስክንድር ፍሬው ይህ ግርግር ተከሰተ የተባለው አካባቢ ቢሄዱ እውነቱን ይዘግባሉ ተብሎ ተፈርቶ ይሆን? የአሸባሪዎች አባላትን ድምፅ በማያያዝ ስለኦሮሚያ ወቅታዊ ሁኔታ እየተባለ መዘገብ የተመቻቸው.
በኢትዮጵያ መንግሰት ስልጣን የያዘው ኢህአዴግ ግን ከዚህ የከፋ ችግር ገጥሞት ፈትቶ እንደሚያውቅ አያወቁ ይሆን? የእነሱ  በየጊዜው ማላዘን ወይም ቱልቱላነት በአፍሪካ ቀንድ አገራት ጠንካራ የሆነን መንግስት በግርግርና በጩኸት ለማስወገድ የሚደረገዉ የአሸባሪዎች ርብርብ ቀቢፀ ተስፋነት መሆኑ የቪኦኤ ጋዜጠኞች ሊያውቁት ይገባል፡፡ ቪኦኤዎች የግል ስሜታቸሁን በመጠቀም የጋዜጠኝነት ተግባራችሁን ከምታበላሹና የአሸባሪዎች ቱልቱላ ከመሆን ይልቅ አለምአቀፍ እና የትልቅ አገር ሚዲያ መሆናችሁን አውቃችሁ ሚዛናዊና እውነተኛ መረጃ ስለኢትዮጵያ ብትሰጡ ከታሪክ ተወቃሽነት ትድናላችሁ እላለሁ፡፡